隨心拍

攝於公司外的柴灣嘉業街 (15/2 晚上10時35分)。

下班時發現四野迷濛一片，連50米外的樓宇也被濃霧吞噬。此時王兜突然心血來潮，取出傻瓜數碼相機，隨手拍幾張相，理得它是否有人氣。因為晚上的嘉業街即使有人與否，都是死寂一片，濃霧只係死寂的街道上點綴一下罷了。

多拍幾張時，突然想起攝影狂人覃健。心想，到底覃見到公司外如此情景，會駐足拍照或者只是呼一口煙便離開？我自知攝影技術遠遠不及覃，於是「有理無理」取出相機胡亂拍攝一番，免得後悔。

就當是練習，又或是幫相機鬆鬆筋骨吧。

Franz Ferdinand live in Hong Kong

尾段《Outsiders》來一次打鼓三重奏，為 Franz Ferdinand live in Hong Kong 掀起另一個高潮。

Franz Ferdinand 未必係一隊技術好 top 既 band，但可以肯定佢地係一隊好好既現場樂隊，活力十足，而且佢地自己帶來港既音響都真係唔錯，起碼冇拆聲先。$480可以睇到如此水準既表演，真係抵。當然，買飛前絕對唔會咁諗。下次當有心水 band / 歌手來港時，真係唔好猶豫又話冇錢云云，唔睇一定後悔，呢次都唔例外。

我既位置正係中間方落位，唔係太高，唔係太側，與舞台距離尚算適中，而且係觀賞美女既好位置，惟一係坐起度等開場時，雙膝被鐵欄緊緊卡住……

佢地當晚都係唱番2隻大碟既歌，而我難得地對呢d 歌都叫做耳熟能詳，唱番一兩首亦不成問題。當佢唱 Take Me Out 時，我真係興奮到跳起，就好似其他觀眾咁。即使發現雙腳發麻，仍然不自覺地跳起黎。

Franz Ferdinand 眾成員都幾投入，絕無欺場，就其係主音Alex，又飛腿，又訓地，突然又跳落台，逗人觀眾樂在其中也。

右邊既女仔同我一樣獨自黎睇 show，起初比我靜好多，fing一fing頭，拍兩下手掌，當唱到《40 feets》時，佢都開始投入起黎，又跳又勁拍手，我驚我跳時撞到佢又或者踩中佢對腳。

當時我有衝動想搭住兩邊觀眾(都係香港人，而場內外籍人士 / 鬼仔鬼妹 look 既華人比較多)既膊頭，大家大叫狂跳，盡興一番，反正開心狂歡既時間永遠都係短暫。不過唔知人地點諗，都係算(俾人話非禮就真係乜都唔使睇)。香港人普遍都係比較慢熱，同埋比較鍾意保持丁點距離，或者佢地自細或多或少俾香港既「演唱會文化」影響到。

80分鐘，真係唔多亦唔少。雖然情人不在身旁，但呢一年既情人節仍然值得回味。

p.s 相片來自 miniforum 一網友 (攝於演唱《Outsiders》期間)

神之回歸

想不到，「神」竟然靜悄悄咁返到老家。

唔知道呢次轉會對佢或者球會是禍是福，但對科拿 (Robbie Fowler)來講，絕對係最完美既終點站。

科拿冇當年奧雲等既高速度，亦冇朗拿度或者細哨既盤球技巧，但佢進攻意識同埋射門技術絕對係有一級水準。當年我第一次睇佢用後腳挑起皮球，越過防守球員後，再「窩利」一射，goal！入球就係如此清脆。

自此我就成為佢既支持者，而當時睇足球既樂趣，就係來自佢源源不絕既入球。

利物浦將來幾個月未必會入多幾球、贏多幾場，但肯定既係，最少多左我會支持番利物浦 (當然唔會放棄熱刺啦)。