籃板怪傑

返工時被行家「玩野式」圍毆，我不服氣地同佢地鬥力，結果反被壓過來，手指仲輕微扭傷；星期日梁呆想約我打籃球。估唔到風馬牛不相及的兩件事，令我想起這名怪傑。

Dennis Rodman(洛文)，(撇開佔佢大部分人生既負面新聞不談)，NBA 連續七屆籃板王、兩屆NBA最佳防守球員、5屆NBA總冠軍成員…當我初認識佢時，真係唔明點只得6呎8吋高(或更矮)既佢可以成為搶籃板球專家。

記得佢曾經講出自己搶籃板球既竅門。一，預先佔據有利位置，呢點相信大家睇赤木隊長教櫻本花道時應該聽過，最終目的就係使到對方即使跳到最高亦無法觸及波皮。二，感覺。佢曾經誇口咁講，即使合上雙眼，聽到籃球擊中籃球框既聲音，就可以知道籃球反彈既位置(咁 airball 點算…？)。假如可以有如此預知能力，搶籃板球自然事半功倍，而佢亦用技術證明左呢一點。

仲有兩樣野佢冇誇口，就係先天體質同心態。自從我對呢個怪人有興趣後，都刻意留意佢每一場既表現，希望可以從中改善自己既防守同搶籃板球能力，當年一場公牛對鷹隊既比賽，令我明白到假如要搶到每一球的話，除左要體質好之外，仲要比其他人拼搏。佢起呢場波搶到29個籃板，起比賽初段先起6呎11吋既列拿手頂上連續取得4個進攻籃板；比賽中段柏賓射失一球，當眾人眼望皮球準備出界時，洛文突然從鏡頭角落飛出，直撲向皮球(上圖)…最後 bomb 一聲，佢連人帶波飛出界…全場登時寂靜一片，隨之而來係震耳欲聾既歡呼聲。此時，誰勝誰負早已分出。

連續騰跳既力量之強及速度之快、永不言敗既拼搏精神(後者唔係經常有)，高超既水平面防守技術，足以使射術極差既佢(曾見佢連續4次籃下不入 = 最少搶左3個進攻籃板球；射罰球airball 亦有…)起NBA立足十多年。佢同球神佐敦唯一較為相似既地方，就係假如佢地想的話，隨時可以將籃球場變成自己既舞台。

初試啼聲

我發誓，我死也不能做隻餓鬼。

除了親友及少數友人之家屬外，我暫時看不到將來有人會為我做食物。

於是，我心裡想著：「不學煮食者必自斃…」與其等人為我煮飯，倒不如自己學三招兩試，除了肚餓食公仔麵之餘，都「有餐飯仔」食。

不過，喜歡食甜品的王兜，還是想先學做甜品，結果就有這盤類似食物的東西誕生。

經過餒敗餒試後，終於做出類似蛋撻的製成品。捧場人數不多，除了家人吃了三兩個外，其餘均為自己「硬食」。首次做蛋撻，牛油皮色水未夠靚，而且較為甜，不過餡則可以接受，暫時歸類為「人類可試吃」之物體。

下次放假再做時，會進一步減少份量，一來可以逐步改善，二來避免自己過量服食未成為食物之物體。

積木電影

冇錢買攝影器材、又冇錢請有名氣既演員，但又想拍到好戲？得！咁導演就要起劇本同人物刻畫花上心思喇。《遇人不熟》相信係窮導演既啟蒙電影。

呢套戲既導演曾經講過，由於冇錢買好既攝影器材，於是要問人借用，拍攝其實差d 跌爛部機，嚇得佢死死下…大難不死，最少佢都已經闖出個名堂來。

其實《遇人不熟》原本由一個簡單不過既故事，但導演刻意將佢打散，等觀眾自行將故事重組。
起初劇情頗為沉悶，自己以為去錯戲院睇緊《電車男2》，但熱身過後就係一段段時空既穿梭。每加插一段時，人物既性格就更加凸顯，而觀眾都會有：「哦，原來係咁」既想法，然後就會自行組織整個故事，而整個故事亦都逐漸浮現出黎。

當我離開戲院後，自行將故事再重組多一次，同自己講：「頂，原來只係咁…」不過假如套戲平鋪直敘的話，真係搵鬼都未必睇。導演功力應記一功。

記得出第一次字幕時唔好走住。